شكون بغاه أ ميمتي..عندك شي ولدك مبّلي؟

 

 

 

 

 

 

 

 في سعي والتزام مني باش نقطع الكارو ولّيت ندّي معايا الكِيف والسبسي للقهوة، وعوض طاليان فالكاس، رجعت كنطلب من جَامع يجيب براد وينقص فالتلفزة، ويرد معايا البال للجدارمية لي محيحين فالفيلاج راه ما فيا لي يبّات على الدّص.. كنتركّن فالقنت بمكان يسمح لي بإلقاء نظرة واضحة على الفضاء الخارجي، ونبدا.. تُّفْ.. تُّفْ.. تا نتبجّقل. الحاصول، واحد المرا شيبانية كتجي تسعى فالقهوة، وما يمكن تخرج خاوية الوفاض من هنا وخا لي فيها هوما نيت محتاجين الصدقة، نظرا لأنها كتجبر عينيك على تلقف منظرها بشفقة وتعاطف، وتا إلى ما عندك تا ريال، كتفوّبر معاها فالدعوة وكتسبّقها:

ء الله يسهل عليك وعلينا أ مّيمتي.

كنعرفها.. وسبق ليا، نهار تكون الوقت مزّوهْرة، دوّرت معاها، وغا أنا نكون عاطيها شي ألف ريال مفرقة.. ما كانتش كتلاقني نكمي الشّقوفة ( الكِيف) بل شاد كارو نجغم من الطاليان فالكاس.. جات اليوم تطلب.. دازت على شي وحدين قدامي غالطبلة، عطاها واحد فيهم درهم، وجات عندي لقاتني يا الله عمّرت السبسي:

ء صدقة الله يرحم الوالدين..

خوكم جيبو يصفر يدخل ليه الفار يطلب اللجوء للصومال، ولقاتني بديت ندخل ل "والت ديزني" ديالي.. فابغيت نكون محترم كما عهدتني من قبل، وجاوبتها:

ء الله يسهل أمّيمتي.

فالعادة، فاش كنكول ليها الله يسهل كتحرّك تمشي تقلب على زهرها عند الكليان الأخرين، لكن اليوم بقات واقفة تا دخلتني الشّك فأش أوا بيني وبين هاذ المصيبة؟ وبشوية كوّزت باش تقرب ليا:

ء عندك شي جوان أوليدي؟

ء شكون بغاه أ ميمتي..عندك شي ولدك مبّلي؟

ء أ لواه يا.. بغيت نستونا بيه فالليل مع الماحيا..

عطيتها النمرة، وكولت ليها مع السبعة راه غا نكون فالبلاصة الفلان الفلانيّة جي مرحبا بيك تكمي وتشربي تا تولي .. لحقاش ناس زمان كالو:

ء إلى ما مشيت لمكة خوي للشيبانة السّدة.

وإلى رجّعت معاها شي ريال تجي تعكر عليا، وغا نصيفطها تحبو لدارها، باش تعلم تجي تسكرنا على مآسينا..درهم عطينها ليك باش باش تقبل عند الله وتسكتي بها شهوة البطن.. ماشي باش تفّتَل فجوان   ..

  ب.س:

بوجمعة غا يكون سعيد الليلة.

حسن الحافة